外出工作

上星期全部返工時間都返自己灣仔的辦公室,今個星期又開始出街做野的日子!!!

今期的工作每日都會去幾個唔同地點,我阿姐唔需要做呢類工作,所以得我和我同事,其實佢嚴格來說是我的下屬,但佢冧得我阿姐掂,所以佢都唔係太放我在眼內!!!~~~

今早先要去觀塘,去親觀塘我呢位同事好多時會遲到,因為佢話塞車喎!!!今早佢遲到,所以我自己開工先,免得做唔切d野!!!~~~

係觀塘做完野後,我同呢位同事講左下午的工作地點和時間,因為佢唔會同我食飯的,所以我們係各自各去下一個工作地點!!!

我自己先去食飯,再行左一陣,之後坐地鐵去探下blog友仔,順便係花園街望左兩望! 之後坐小巴去下午的工作地點......

我去到目的地後,收到呢位同事電話,話佢要比原定時間遲20分鐘先可以到達,結果我去左附近的圖書館坐!!!~~~佢到達後我們再開始工作,我聽到佢同人傾電話,從電話的內容我估佢食飯時間應該係去左旅行社報名去旅行,結果搞到咁遲......

我呢位"下屬" ,就是那個我叫自己要摒棄個人成見的同事,您們可能會奇怪,既然佢成日都遲到(平時佢返工都好遲,今天仲要上下午都遲,但佢覺得無野喎,唔會講唔好意思), 作為上司的我點解 "無反應" 喎......

但我想講,我呢位"下屬" 係十分之得我阿姐心,我阿姐在評核報告每次都俾最高等級(A)佢,連我都攞唔到A呀,我邊有資格話佢呀……

加上佢好識做人,係阿姐面前好少遲到,仲會爭住幫阿姐拎野,又會在我們辦公室煲水和斟水俾阿頭飲(我們辦公室有水機,但有幾位同事喜歡飲煲過的水,而我呢位”下屬” 帶左個電水煲返辦公室,所以佢一煲完水就會話 “水滾喇”, 仲會拎埋個水壺入阿頭間房斟水佢飲)!!!~~~

我就無咁好資格飲佢D滾水呀,我都係飲水機的水就算……有時我都唔明其他同事點諗,既然想飲煲過的水,點解唔自己帶個水電水煲呢,自己鍾意幾時飲就自己煲,做乜要痴人地個煲呢???想飲滾水又懶得自己去裝水和煲水???所以造就我呢位”下屬”係眾人面前樹立左 “照顧周到”的形象!!!

其他人仲以為我有位得力助手,唔知道佢成日都遲到,做野又唔係特別醒,有時都會有d大意……所以,我一直都唔係太喜歡呢位同事, 因為我覺得佢做野唔夠自律和認真,遲到啦, 傾電話,食完飯人地個個開始做野佢仲一面剥橙一面翻報紙,成日掛住打理佢d魚,洗魚缸(佢o係公司養魚), 又成日玩電話 (係我阿姐面前都照玩,因為我阿姐都經常玩電話)…偏偏佢有佢o既生存之道,甚至 “得寵” 過我呢d顧住做野的人(我阿姐雖然對我幾好,但佢錫其他同事多過其我,呢d野唔係我作,而係曾經有另一個不是隸屬我阿姐的同事有次傾開計,話佢覺得我阿姐好錫那位有經歷的同事)……咁我呢位有經歷的同事比我 “下屬” 好得多,所以我都唔會唔順利...

每當諗起呢d事, 我都會忟忟地, 但我完全奈佢唔何, 唯有同自己嬲和計較都無用,做哂野咪放工囉, 反正我總會調職,做多一段時間我就會調去另一個職位!!!~~~我亦都唔會同人爭籠,我都係本著做好自己本份和負任的態度去工作, 但可能我唔埋堆又唔叻同人social, 所以會蝕底d!

再講番今日去圖書館,因為我要過兩個星期要考英文筆試,所以諗住睇下有無書o岩借啦, 點知d書都係講d比較表面的東西,所以無借到書,我打算睇多d英文報紙作預備!!!~~~