失敗的練習作

之前提過我想織背心,距離我上次匯報的編織進度己有一段時間,中途因為有其他野要做所以停左一陣,斷斷續續咁終於織好左前幅

好明顯,呢個織得好失敗,中間有一段織錯左,而且個膊位我縑太窄呢,原圖係咁





真的相差好遠呀,令我諗緊係咪應該拆哂佢再來過,咁樣拆法,真係到冬天都未必有完成品!!!

行走

我的工作每隔幾個月就要去一之我部門港九新界各大"分公司" 巡查,呢項工作係我最討厭的,因為一日要去幾個地方都幾辛苦!!!~~

今天早上先去觀塘,之後去左油麻地做野,係油麻地做完野夠鐘食飯,我因為想去某間店舖,該舖位於油麻地與旺角的中間(栢裕商業大厦),所以我由油麻地行去栢裕商業大厦(第一次咁行過去),去完栢裕後再行去旺角銀行中心附近食午餐,食完飯再坐小巴上何文田做野!!!

換著是以前的我,一定唔會咁行法,因為我係極之唔識路的人,但返左呢份工接近兩年,已經"鍛鍊"自己行多左,但夏天咁行法,亦令我出多左雀斑,所以要加緊防曬!!!~~~

另一工作地點

今明兩個星期都會在葵芳返工,地點較近屋企,中午食飯都有不少選擇(雖然大部分都偏貴),食完飯有時間仲可以行下街(今日行行下見到我表妹,原來佢都在附近返工)!!!

而且呢個工作地方的洗手間係好乾淨的,我們工作的地方亦坐得好舒服,算是各個工作地點中最靚的一個!!!~~~


p.s 今日開始yahoo有番留言通知,真係唔知佢幾時short,幾時正常!!!

行街買野

今日去左屯門和元朗兩個!

去屯門買左呢個"玩具"

其實我想買家用美容儀好耐,但日立那部要成近仟元,我驚買回來唔o岩用會好o徒錢,所以買呢部平平地(二佰幾)玩下!其實用緊部機時無乜感覺.....都唔知係咪真係有用,我估呢部機都應該無乜功效!!!~~~

棉花和洗面試用裝係附送的.....


行完屯門,去返元朗睇中醫,今次約的時間較早.所以睇完都唔算好夜! 睇完中醫,又行左一陣元朗,買左呢個



之後再去換手錶的電池,換完就回家!!!~~~

今日都算收穫豐富,都好似買埋哂d無謂野.....

新阿頭

我工作所屬的組別五月來了新的阿頭,以前的阿頭調住另一組別!

我們組的呢位阿頭簡直係"運動家", 佢會跑馬拉松,又會扒龍舟!!!就算呢d咁熱的天氣,佢有時都會特登早幾個站落車行番公司,真係佩服佢!!!

上堂

今朝早上要去上堂,出門時都無雨! 但中午聽完講座出去食飯時落大雨,我和同事們求其係附近食午餐就算!

食完野行去搭車返公司,一樣都係咁落雨,再加上有風,所以呢幾日都幾凍,晚上睡覺都唔需要開冷氣!!!~~~

呢排yahoo blog又唔知做乜事,我在別人blog留意見後,blog主給我的回覆沒有電郵通知,其他人在我blog中留言我也收不到電郵通知,是否我set錯野呢???~~~

端午節

今朝一早就肚痛,可能呢排出街食飯多左,搞到每隔兩星期到就會肚疴,我的腸胃真的好差,所以今日端午節都無食糉!!!~~~

朝早好早就起身,但都無出街,在家休息下,下午就落街散步,悠閒咁過左一日假期!!!

出街

最近天氣熱,都好少行街,見今日有少少風,所以出左屯門!!!

先去飲荼,再行商場,基本上周圍都好多人,所以行左一陣就回家!!!回家途中有人派樓盤的傳單,d樓價根本都好似無跌過,尤其係西鐵站附近的地區!!!

回家前先去圖書館,借左幾本書,遲d有時間可以慢慢睇!!!

面試

話說之前三月的筆試過關後,我仲要再面試先完成哂所有程序!而今天就是面試的日子,我都有心理準備面試有不會太輕易,所以自己都有做預備工夫!!!

今日的面試對方亦問左好多條問題,有d我都唔識答,這次的面試真的不易應付,自己的機會應該也不大,但當作是一次經驗吧!!!

面試完我約左朋友食飯,咁o岩三位考官又去同一個地方食飯,仲坐我隔離枱,真係"有緣"!!!~~~