本來我上年12月中會返醫院覆診,但當時我咳緊唔舒服,所以改為今天先覆診!!!~~~
我的覆診時間是3點,中午我們的大大大老闆請食午飯,我食完飯即刻趕去醫院,去到醫院大約3點半!!!~~~
今日唔知發生咩事,大家一直等,5點後都仲有3個人(包括我)未睇症,真係從未試過等咁耐,姑娘都同我講唔好意思!!!而我仲係全場最後一個入診症室,當時已經近5點8! 我今次覆診不愉快除了有一少部分係因為等得耐(呢個絶對不是主要原因),我最最最唔開心係覺得呢位醫生好敷衍!!!~~~
今次係睇一位好年青的女醫生,入到診症室後佢循例問下我一些問題,我就講哂我的情況佢知,佢再幫我檢查下,跟住話我的情況同之前差唔多,無乜特別! 佢話我唔做手術的話,無乜野可以跟進,返來覆診都無乜大意義,我覺得佢比較 "官腔"!!!
然後佢又叫我伸直雙手,我見到我左手好似有少少手震,阿醫生問我平時係咪好緊張! 我話我而家都無乜緊張呀!!!~~~
上月我病時去過公營診所睇醫生,當時我同醫生講話我成一年無驗過血,使唔使再驗,那位醫生話可以幫我再抽血檢查下,但由於我當時病緊,所以無立即抽! 咁呢位醫生寫左張表格列明我要抽血檢查的內容,叫我好返再去診所抽!!! 由於我想我的病歷統一少少,所以我諗住今日去醫院抽埋血,咁醫院跟進時都有齊全的紀錄(因為那間公營診所無專科,只有一般門診,而我抽血的檢查是關於我睇緊的專科)!!!咁我拎左呢份表份俾今日那位醫生睇,同佢講話我都有近一年無抽血檢查,可否安排我今次抽血呢???
今日呢位醫生就話: "每個醫生都有不同睇法,等我講返d規矩先啦,無人話要一年或定期抽血檢查,您可以上網查下,之前都幫您抽過血,而且唔止抽過一次!
去到呢度,我都有少少嬲,仲火火地, 我心諗我而家係o黎睇醫生,唔係入課室聽老師上堂,您使唔使用 "規矩" 來 " 撻"我呀!!!~~~
於是我都不甘示弱,我話 "ok, 咁您而家係咪認為我無需要抽血! 無錯,我在醫院係抽過血,但那兩次抽血的時間已經分別是2011年中和2012年2月,相隔咁耐,係咪應該再做一次檢查比較妥當呢!"
咁醫生又話: 如果您而家無新病徵,係無需要抽血! 您有無心跳呀???
我答:有呀,我早上有時近6點就會心跳,跟住醒左,我之前都會咁跳呀!!!~~~
醫生佢再問: "以前同而家係咪一樣咁跳法呀"...我答佢以前同而家都會跳,但有少少唔同跳法囉...(其實我都唔係太識分別跳法的不同)
可能醫生覺得我好煩而且感覺到我不滿,最終都有幫我安排抽血! 我心諗,好在我比較年青識得爭取,換轉係一些上年紀的病人,好易就會俾醫生打發算數~~~
跟住醫生話我的情況,唔做手術返來覆診都係見下醫生咁啫,無乜特別野做,一年後先再返來覆診啦!!!
我梗係唔會咁 "順攤" 由得佢耍走我,我答話一年咁長時間,中間有咩變化好難預計,可否大半年覆診一次呀!!!
然後阿醫生有少少晦氣咁話: 有變化您肉眼都識分到和睇到,您自己都識去感覺,如果真係有大變化您可以打電話返來提早見醫生"~~~
聽到佢咁聽,我就話 "我只係普通常人,我的觀察和判斷未必一定準確,最好的方法應該是由醫護人員定期去跟進和判斷!!!~~~
您估下阿醫生點反應......
佢話 " 我同您的觀察唔會有大分別喎,都係咁去睇啫"......
雖然最後佢都係排左大半年後覆診,但您話係咪真係俾呢個醫生激親吖...咁同病人講野都得...佢今日所講的說話和態度亦令我有少少不滿和嬲
見完醫生我急急腳出去揾姑娘抽血(因為姑娘要等全部人睇哂先可以離開),費時阻住人咁耐...抽完血終於可以回家,回家時間同我平時放工接近,真係無諗過搞咁耐~~~
我明白政府醫謢人員每日都處理好多工作,但可否多從病人角度出發呢....試諗下,一個病人排期成半年,掛號後再等超過2小時先見到醫生一面,但竟然用如此敷衍,官腔和草草了事的心態去面對病人,實在令病人失望!!!~~~
我平時都算係一個 "淋善"的人,好少會咄咄逼人,但遇到今日呢位醫生我都忍唔住要"反抗"...
能夠遇到好醫生,真是一件幸運的事!!!~~~有時睇唔睇到好醫生都好靠彩數!!!我不知道是否因為呢位醫生太年青抑或是她個人問題,姑勿論她的醫術是否精湛,但我認為她對待病人的態度仍然有待改善!!!~~~
2013年1月18日 星期五
不愉快的覆診
2013年1月17日 星期四
俾人嚇一跳...嚇到我捉住阿姐隻手
今天下午要去聽講座
,所以我今日無帶飯,和同事去左"八囍"飲茶!!!
我第一次去呢度食野,我們點了胡椒餅(呢個辣我無食), 擔仔面,蝦餃,粢飯,奶皇飽,,排骨飯和油麥菜,味道都幾好,呢間店話自己無味精喎!!!甜品我們揀左羌茶珍珠湯圓,有一粒粒黑色好似珍珠奶茶的珍珠,但較稔,湯圓是芝麻湯圓!!!~~~
食完飯我和我阿姐、再加另外一位女同事三個一齊坐巴士去舉行講座的地點! 落車後要過兩條馬路...我阿姐行最前,中間係我,我同事行最尾,過完第一條馬路去到中間等紅綠燈過第二條馬路時,行係我阿姐前面的一位阿伯突然"啊"一聲大叫,嚇到我即刻住我阿姐隻手
...
其實我當時會捉住阿姐隻手一方面係有少少驚啦
...另一方面我怕那位阿伯轉身時會傷害到我阿姐,咁我捉住阿姐到時都可以拉開阿姐!!!~~~
那位伯伯"啊"左一聲之後無其他特別行為,停在原地, 我們三個見綠燈照過埋條馬路(當時仲有其他路人)~~~
當時我嚇到個心卜卜跳,好在我阿姐當我隔離,俾我捉住佢定下神(雖然阿姐無話我亦無扯開我隻手,但佢可能心中暗叫唔好彩,無啦啦俾我呢個手下捉住隻手,仲可能覺得我好無用
)!!!行最尾的女同事可能見到我捉住阿姐隻手咁"激動",問我係咪好驚...我就答"XXXX(我阿姐英文名,平時我們都稱呼大家的英文名)唔驚呀,但我驚到捉住左佢隻手"~~~
我呢位阿姐(就是平安夜返工送面膜給我的那位)為人真係唔錯的,食飯會夾餸俾我地,又唔會成日催我們做野!!!雖然佢平時都係靚太一名
,著得好靚咁返工,但有時我們出街做野去到一些環境差少少的地方
,佢都唔會嫌三嫌四,"容忍"到比我仲高(我比較麻煩,有時去到一些工作環境,我會覺得無自己寫字樓咁乾淨企理,尤其係洗手間),所以我都幾欣賞佢
!!!~~~
當我再回想返呢件事,我都覺得自己太誇張
,而且仲好"小朋友"!!!咁大個人都鬼咁細膽,咁少事都會被嚇到!!!~~~我真係要好好檢討下,下次要鎮定d先得~~~
2013年1月15日 星期二
一個人的旅行 之 獨立
這幾天因為要揾某些資料,在網上看到不少人的遊記
!!!~~~
數數手指,我自從2009年後都無去過旅行
(因我2010年開始兼讀課程,大部分假期都用作温習和考試)!!!~~~
我都幾矛盾的,有時又想去下旅行散散心,但有時又覺得放假在家/留港都一樣開心,無需一定要去旅行!!!~~
網上見到有不少人都是自己一個去旅行的,其實這也是一個好好的鍛鍊機會,擴闊眼界之餘,仲可以訓練自己更加獨立!!!~~~不過我相信暫時我都無乜膽量一個人出遠門,總覺得有其他同伴有個照應無咁危險!!!
人是要成長的,我總覺得自己和同年紀的人相比,依然是屬於比較遜色!!!~~~我一直都覺得自己唔夠獨立,此乃我其中的一個不足之處!是因為我的性格較內向所致嗎???
我在 “2013” 那篇網誌的期許也包括希望自己今年更獨立呢!!! 點先可以令自己更獨立呢???暫時來說,或許作出不同的嘗試是訓練獨立的方法之一,所以我都會嘗試下以前未試過做的事情,起碼都係一種突破
!!!~~~
2013年1月12日 星期六
第一次跟blog友見面,坐低食野
鉤鉤下電話響
,原來係blog友打給我約我見面呀,真係好開心,好難得呢
Blog友帶左我去食拉面呀仲送野給我,食野之餘仲傾左好耐
,blog友同時鼓勵我思想要更加正面,唔好成日諗得咁灰,真的好多謝佢呀
!!!~~~見面完畢後,我自己行左一陣,買左uniqlo的heattech打底衫,好多人都暖而我又超級怕凍,但我一路都覺得件衫咁薄,暖極有限,所以一直無買,見佢而家由129減到99 ,姑且買一件試試,今天真的收穫豐富
!!!~~~
